Ioba 28

1HE oiaio, he wahi ahu no ke kala, A he wahi no ke gula, kahi a lakou e hoomaemae ai.

2Ua laweia ka hao mailoko mai o ka lepo, A ua hooheheeia ke keleawe mailoko mai o ka pohaku.

3Hoonoho no ia i ka hope no ka pouli, A imi no ia ma na wahi hohonu a pau; I ka pohaku o ka pouli a me ka malu make.

4Eli ae ia i lua mao aku mai kahi e noho ai na kanaka; Iho lakou ilalo aole ma ka wawae, A lewa lakou mai kanaka aku.

5O ka honua, kahi i puka mai ai ka berena, Ua hoohuaiia oia malalo iho ona e like me ke ahi.

6O kona mau pohaku, kahi o ka sapira; A he lepo gula kona.

7O ke alanui aole i ikeia e ka manu, Aole i ikeia e ka maka o ka vuletura;

8Aole i hehi iho na holoholona hihiu ia ia, Aole ka liona i maalo ae ilaila.

9Kau aku no ia i kona lima maluna o ka pohakupaa; Hookahuli ae ia i na mauna mai ke kumu aku.

10Hoopoha no ia i ke kahawai mawaena o na pohaku; A ike no kona maka i na mea waiwai nui a pau.

11Pani aku no ia i na wai i ke kahe ana iho, A o na mea i hunaia kana i lawe mai ai i ka malamalama.

12Aka, mahea la e loaa'i ka noeau? Mahea hoi kahi o ka naauao?

13Aohe kanaka i ike i kona kumukuai; Aole hoi e loaa ia ma ka aina o ka poe e ola ana.

14I mai ka hohonu, Aole ia iloko o'u: I mai la hoi ke kai, Aole ia me au.

15Aole e haawiia ke gula maikai i kumu e loaa mai ai, Aole hoi e kaupaona ke kala i kumukuai nona.

16Aole e kau pu ia oia me ke gula o Opira, Me ka pohaku onika maikai a me ka sapira.

17Aole e hoolikeia ke gula a me ka pohaku aniani me ia: Aole e hooliloia ia mea no na ipu gula maikai.

18Aole e manaoia ke akoakoa, a me ka pohaku maikai: No ka mea, o ka waiwai o ka noeau ua oi aku ia mamua o na momi.

19Aole e hoolikeia ke topaza o Aitiopa me ia, Aole hoi ia e kau pu ia me ke gula maikai.

20Mai hea mai hoi ka noeau? A mahea hoi kahi o ka naauao?

21No ka mea, ua hunaia oia mai na maka aku o ka poe a pau e ola ana, A ua nalo oia mai na manu o ka lewa aku.

22I mai la ka po a me ka make, Ua lohe no maua me ko maua pepeiao i kona lono.

23Ua maopopo no i ke Akua kona aoao, A oia ka i ike i kona wahi.

24No ka mea, oia ka i nana aku i na welau o ka honua, Ua ike no ia malalo o ka lani a pau;

25E hana i ka mea kaupaona no ka makani, A ua ana no ia i na wai maloko o ka mea ana.

26I kana hana ana i ke kanawai no ka ua, A me ke ala no ka uwila o ka hekili;

27Alaila ike no oia ia mea, a hoike mai hoi ia; Hoomakaukau oia ia mea, a imi aku hoi ia mea.

28A ua i mai no ia i ke kanaka, Aia hoi, o ka makau i ka Haku, oia ka noeau; A o ka haalele i ka hewa, oia ka naauao.