መጽሐፈ፡ ኩፋሌ 5

1ወኮነ፡ አመ፡ ወጠኑ፡ ደቂቀ፡ እጓለ፡ እመሕያው፡ ይብዝኁ፡ ዲበ፡ ገጸ፡ ኵላ፡ ምድር፡ ወአዋልድ፡ ተወልዳ፡ ሎሙ።

2ወልህቀት፡ ዐመፃ፡ ዲበ፡ ምድር፡ ወኵሉ፡ ዘሥጋ፡ አማሰነት፡ ፍኖታ፡ እምሰብእ፡ እስከ፡ እንስሳ፡ ወእስከ፡ አራዊት፡ ወእስከ፡ አዕዋፍ፡ ወእስከ፡ ኵሉ፡ ዘያንሶሱ፡ ውስተ፡ ምድር፡ ኵሎሙ፡ አማሰኑ፡ ፍኖቶሙ፡ ወሥርዓቶሙ።

3ወርእያ፡ እግዚአብሔር፡ ለምድር፡ ወናሁ፡ ማሰነት፡ ወአማሰነት፡ ኵላ፡ ዘሥጋ፡ ሥርዓታ፡ ወአእከዩ፡ ኵሎሙ፡ ቅድመ፡ አዕይንቲሁ፡ ኩሉ፡ ዘሀሎ፡ ውስተ፡ ምድር።

4ወይቤ፡ ይደመስሶ፡ ለሰብእ፡ ወኵሉ፡ ዘሥጋ፡ ዘመልዕልተ፡ ገጸ፡ ምድር፡ ዘፈጠረ።

5ወኖኅ፡ ባሕቲቱ፡ ረከበ፡ ሞገሰ፡ በቅድመ፡ አዕይንቲሁ።

6ወዲበ፡ መላእክቲሁ፡ እለ፡ ፈነወ፡ ውስተ፡ ምድር፡ ተምዐ፡ ፈድፋደ፡ ይሠርዎሙ፡ እምኵሉ፡ ሥልጣኖሙ።

7ወዲበ፡ ውሉዶሙ፡ ወፅአ፡ ቃል፡ እምቅድመ፡ ገጹ፡ ከመ፡ ይምሐፆሙ፡ በሰይፍ፡ ወያሰስሎሙ፡ እምታሕተ፡ ሰማይ።

8ወይቤ፡ ኢይነብር፡ መንፈስየ፡ ዲበ፡ ሰብእ፡ ለዓለም፡ እስመ፡ እሙንቱ፡ ሥጋ፡ ወይኩን፡ መዋዕሊሆሙ፡ ምእት፡ ወዕሥራ፡ ዓመት።

9ወፈነወ፡ ሰይፎ፡ ማእከሎሙ፡ ከመ፡ ይቅትሉ፡ አሐዱ፡ ቢጾሙ።

10ወአበዊሆሙሰ፡ ይኔጽሩ፡ ወእምድኅረዝ፡ ተአስሩ፡ ውስተ፡ መዓምቅቲሃ፡ ለምድር፡ እስከ፡ ዕለተ፡ ደይን፡ ዐባይ፡ ለከዊነ፡ ኵነኔ፡ ዲበ፡ ኵሎሙ፡ እለ፡ አማሰኑ፡ ፍናዊሆሙ፡ ወምግባሪሆሙ፡ ቅድመ፡ እግዚአብሔር።

11ወደምሰሰ፡ ኵሎ፡ እመካኖሙ፡ ወኢተርፈ፡ አሐዱ፡ እምኔሆሙ፡ ዘኢኰነነ፡ በኵሉ፡ እከዮሙ።

12ወገብረ፡ ለኵሉ፡ ግብሩ፡ ፍጥረተ፡ ሐዳሰ፡ ወጻድቅተ፡ ከመ፡ ኢየአብሱ፡ በኵሉ፡ ፍጥረቶሙ፡ እስከ፡ ለዓለም።

13ወኵነኔ፡ ኵሎሙ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ ወአልቦ፡ ዐመፃ።

14ወአልቦ፡ ምንተኒ፡ ዘበሰማይ፡ ወዘበምድር፡ ወውስተ፡ ብርሃን፡ ወውስተ፡ ጽልመት፡ ወበሲኦል፡ ወውስተ፡ ቀላይ።

15በእንተ፡ ኵሉ፡ ለዐቢይ፡ በከመ፡ ዕበዩ፡ ወለንኡስሂ፡ በከመ፡ ንእሱ፡ ወለለ፡ አሐዱ፡ በከመ፡ ፍኖቱ፡ ይኴንኖ።

16ወኢኮነ፡ ውእቱ፡ ዘይነሥእ፡ ገጸ፡ ወኢኮነ፡ ውእቱ፡ ዘይነሥእ፡ ሕልያነ፡ እመ፡ ይቤ፡ ይግበር፡ ኵነኔ፡ ለለ፡ አሐዱ፡ ወአሐዱ፡ እመ፡ ወሀበ፡ ኵሎ፡ ዘውስተ፡ ምድር፡ ኢይነሥእ፡ ገጸ፡ ወኢይትሜጠው፡ እምኔሁ፡ እስመ፡ መኰንነ፡ ጽድቅ፡ ውእቱ።

17ወዲበ፡ ደቂቀ፡ እስራኤል፡ ተጽሕፈ፡ ወተሠርዐ፡ እመ፡ ተመይጡ፡ ኀቤሁ፡ በጽድቅ፡ የኀድግ፡ ኵሎ፡ አበሳሆሙ፡ ወይሰሪ፡ ኵሎ፡ ኀጢአቶሙ።

18ተጽሕፈ፡ ወተሠርዐ፡ ይትመሐር፡ ለኵሉ፡ እለ፡ ይትመየጡ፡ እምኵሉ፡ ጌጋዮሙ።

19ወዲበ፡ ኵሎሙ፡ እለ፡ አማሰኑ፡ ፍናዊሆሙ፡ ወምክሮሙ፡ እምቅድመ፡ አይኅ፡ ኢተንሥአ፡ ገጾሙ፡ ዘእንበለ፡ ለኖኅ፡ ባሕቲቱ፡ እስመ፡ ተንሥአ፡ ሎቱ፡ ገጹ፡ በእንተ፡ ውሉዱ፡ እለ፡ አድኀኖሙ፡ እምነ፡ ማየ፡ አይኅ፡ በእንቲአሁ፡ እስመ፡ ጻድቅት፡ ይእቲ፡ ልቡ፡ በኵሉ፡ ፍናዊሁ።

20ወይቤ፡ እግዚአብሔር፡ ይደመስስ፡ ኵሉ፡ ዘዲበ፡ የብስ፡ እምሰብእ፡ እስከ፡ እንስሳ፡ እስከ፡ አራዊት፡ ወእስከ፡ አዕዋፍ፡ ወእስከ፡ ዘይትሐወስ፡ ዲበ፡ ምድር።

21ወአዘዞ፡ ለኖኅ፡ ይግበር፡ ሎቱ፡ ታቦተ፡ ከመ፡ ያድኅኖ፡ እምነ፡ ማየ፡ አይኅ።

22ወገብረ፡ ኖኅ፡ ታቦተ፡ በኵሉ፡ በከመ፡ አዘዞ፡ በክልኤቱ፡ ኢዮቤልዉ፡ ዓመታት፡ በኃምስ፡ ሱባዔ፡ በኃምስ፡ ዓመቱ።

23ወቦአ፡ በሳድስ፡ ሎቱ፡ በካልእ፡ ወርኅ፡ በሠርቁ፡ ለካልእ፡ ወርኅ፡ እስከ፡ አመ፡ ዐሡሩ፡ ወሰዱሱ፡ ቦአ፡ ውእቱ፡ ወኵሉ፡ ዘአባእነ፡ ሎቱ፡ ወስተ፡ ታቦት።

24ወአርኀወ፡ እግዚአብሔር፡ ሰብዓተ፡ መንበሕባሕተ፡ ሰማይ፡ ወአፈወ፡ አንቅዕተ፡ ቀላይ፡ ዐቢይ፡ በሰብዑ፡ አፈው፡ በኆልቍ።

25ወአኀዙ፡ መንበሕባሕት፡ ያውርዱ፡ ማየ፡ እምሰማይ፡ አርብዓ፡ መዋዕለ፡ ወአርብዓ፡ ለያልየ።

26ወልህቅ፡ ማያት፡ ዲበ፡ ምድር፡ ዐሠርተ፡ ወኃምስተ፡ በእመት፡ ተለዐለ፡ ማያት፡ ዲበ፡ ኵሉ፡ ደብር፡ ነዋኅ፡ ወተለዐለት፡ ታቦት፡ እምዲበ፡ ምድር፡ ወታንሶሱ፡ ዲበ፡ ገጸ፡ ማያት።

27ወሀሎ፡ ማያት፡ ይቀውም፡ ዲበ፡ ገጸ፡ ምድር፡ ኃምስተ፡ አውራኀ፡ ምእተ፡ ወኃምሳ፡ ዕለተ።

28ወሖረት፡ ታቦት፡ ወአዕረፈት፡ ዲበ፡ ርእሰ፡ ሉባር፡ አሐዱ፡ እምአድባር፡ አራራት።

29ወበወርኅ፡ ራብዕ፡ ተፈጸመ፡ አንቅዕተ፡ ቀላይ፡ ዐቢይ፡ ወመንበሕባሕተ፡ ሰማይኒ፡ ተእኅዘ።

30ወበሠርቀ፡ ወርኅ፡ ዓሥር፡ አስተርአየ፡ አርእስተ፡ አድባር።

31ወነጸፈ፡ ማያት፡ እመልዕልተ፡ ምድር።

32ወአመ፡ ዕሥራ፡ ወሰቡዑ፡ ሎቱ፡ አርኀዋ፡ ለታቦት፡ ወፈነወ፡ እምውስቴታ፡ አራዊተ፡ ወአዕዋፈ፡ ወዘይትሐወስ።