መጽሐፈ፡ ኩፋሌ 30

1ወበቀዳሚ፡ ዓመት፡ ዘሱባዔ፡ ሳድስ፡ ዐርገ፡ ሳሌምሃ፡ ዘመንገለ፡ ጽባሒሁ፡ ለሰዊማ፡ በሰላም፡ በራብዕ፡ ወርኅ።

2ወበህየ፡ መሠጥዋ፡ ለዲና፡ ለወለተ፡ ያዕቆብ፡ ውስተ፡ ቤተ፡ ሴኬም፡ ወልደ፡ ኤሞር፡ ኤዋዊ፡ መኰንነ፡ ምድር፡ ወሰከበ፡ ምስሌሃ፡ ወአርኰሳ።

3ወአስተብቍዐ፡ እምኀበ፡ አቡሃ፡ ትትወሀብ፡ ሎቱ፡ ብእሲተ፡ ወእምኀበ፡ አኃዊሃ፡ ብእሲተ፡ ሎቱ።

4ወቦኡ፡ ስምዖን፡ ወሌዊ፡ ሰዊማሃ፡ ግብተ፡ ወገብሩ፡ ኵነኔ፡ ላዕለ፡ ኵሎሙ፡ ዕደወ፡ ሰቂሞን፡ ወቀተሉ፡ ኵሎ፡ ብእሴ፡ ዘረከቡ፡ ውስቴታ፡ ወኢያትረፉ፡ ውስቴታ፡ ወኢአሐደ፡ ኵሎ፡ ቀተሉ፡ በጻዕር፡ እስመ፡ ገመኑ፡ ዲናሃ፡ እኅቶሙ።

5ወከመዝ፡ እንከ፡ ኢይትገበር፡ እምይእዜ፡ ለአርኵሶ፡ ወለተ፡ እስራኤል፡ እስመ፡ በሰማይ፡ ተሠርዐ፡ ላዕሌሆሙ፡ ኵነኔ፡ ከመ፡ ያጥፍእዎሙ፡ በሰይፍ፡ ለኵሎሙ፡ ዕደወ፡ ሰቂማ፡ እስመ፡ ገብሩ፡ ኀፍረተ፡ ውስተ፡ እስራኤለ።

6ወመጠዎሙ፡ እግዚአብሔር፡ ውስተ፡ እደ፡ ውሉደ፡ ያዕቆብ፡ ከመ፡ ይሠርውዎሙ፡ በሰይፍ፡ ወከመ፡ ይግበሩ፡ ላዕሌሆሙ፡ ኵነኔ።

7ወብእሲ፡ እመቦ፡ ዘፈቀደ፡ በውስተ፡ እስራኤል፡ የሀብ፡ ወለቶ፡ ወእመኒ፡ እኅቶ፡ ለኵሉ፡ ብእሲ፡ ዘእምዘርአ፡ አሕዛብ፡ ሞተ፡ ይሙት፡ ወበእብን፡ ይውግርዎ፡ እስመ፡ ገብረ፡ ኀፍረተ፡ በውስተ፡ እስራኤል።

8ወኢይትረከብ፡ ዘማ፡ ወርኩስ፡ በውስተ፡ እስራኤል፡ ኵሎ፡ መዋዕለ፡ ትውልደ፡ ምድር፡ እስመ፡ ቅዱስ፡ እስራኤል፡ ለእግዚአብሔር።

9እስመ፡ ከመዝ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ በእንተ፡ ኵሉ፡ ዘርአ፡ እስራኤል፡ ዘያረኵስ፡ ሞተ፡ ለይሙት፡ ወበእብን፡ ይውግርዎ።

10ወአልቦ፡ ለዝ፡ ሕግ፡ ዐቅመ፡ መዋዕል፡ ወአልቦ፡ ኅድገተ፡ ወኵሎ፡ ስርየተ፡ ዘእንበለ፡ ዳእሙ፡ ይሠረው፡ ብእሲ፡ ዘአርኰሰ፡ ወለቶ፡ በማእከለ፡ ኵሉ፡ እስራኤል፡ እስመ፡ እምውስተ፡ ዘርኡ፡ ወሀቦ፡ ለሞሎክ፡ ወአበሰ፡ ለአርኵሶቱ።

11ወአንተኒ፡ ሙሴ፡ አዝዞሙ፡ ለደቂቀ፡ እስራኤል፡ ወአስምዕ፡ ላዕሌሆሙ፡ ከመ፡ ኢየሀቡ፡ እምነ፡ አዋልዲሆሙ፡ ለአሕዛብ፡ ወከመ፡ ኢይንሥኡ፡ እምአዋልደ፡ አሕዛብ፡ እስመ፡ ምኑን፡ ውእቱ፡ በቅድመ፡ እግዚአብሔር።

12በእንተዝ፡ ጸሐፍኩ፡ ለከ፡ ውስተ፡ ቃለ፡ ሕግ፡ ኵሎ፡ ግብሮሙ፡ ለሰቂማ፡ ዘገብሩ፡ ላዕለ፡ ዲና፡ ወዘከመ፡ ተናገሩ፡ ደቁ፡ ለያዕቆብ፡ እንዘ፡ ይብሉ፡ ኢንሁብ፡ ወለተነ፡ ለሰብእ፡ ዘቦ፡ ቍልፈተ፡ እስመ፡ ጽዕለት፡ ውእቱ፡ ለነ።

13ወጽዕለት፡ ውእቱ፡ ለእስራኤል፡ ለእለ፡ ይሁቡ፡ ወለእለ፡ ይነሥኡ፡ እምነ፡ አዋልደ፡ አሕዛብ፡ እስመ፡ ርኩስ፡ ውእቱ፡ ወምኑን፡ ውእቱ፡ እምእስራኤል።

14ወኢይነጽሕ፡ እስራኤል፡ እምዝ፡ ርኵስ፡ ዘቦ፡ ብእሲተ፡ እምነ፡ አዋልደ፡ አሕዛብ።

15እስመ፡ መቅሠፍት፡ ላዕለ፡ መቅሠፍት፡ ውእቱ፡ ወመርገም፡ ላዕለ፡ መርገም፡ ወኵሉ፡ ኵነኔ፡ ወመቅሠፍት፡ ወመርገም፡ ይመጽእ።

16ወአልቦ፡ ነሢአ፡ ገጽ፡ ወአልቦ፡ አድልዎ፡ ለገጽ፡ ወአልቦ፡ ነሢአ፡ እምእዴሁ፡ ፍሬ፡ ወመሥዋዕተ፡ ወጽንሐሐ፡ ወስብሐ፡ ወተምዕዞ፡ መዓዛ፡ ሠናይ፡ ከመ፡ ይትወከፎ።

17በእንተዝ፡ አዘዝኩከ፡ እንዘ፡ እብል፡ አስምዕ፡ ዛተ፡ ስምዐ፡ ላዕለ፡ እስራኤል።

18ወተኀርየ፡ ዘርአ፡ ሌዊ፡ ለክህነት፡ ወለሌዋዊያን፡ ከመ፡ ይትለአኩ፡ ቅድመ፡ እግዚአብሔር፡ ከመ፡ ንሕነ፡ በኵሉ፡ መዋዕል።

19ወከመዝ፡ ያዐርጉ፡ ሎቱ፡ በስምዕ፡ ውስተ፡ ጽላተ፡ ሰማይ፡ በረከተ፡ ወጽድቀ፡ ቅድሜሁ፡ ለአምላከ፡ ኵሉ።

20ወንዜክር፡ ንሕነ፡ ጽድቀ፡ ዘገብረ፡ ሰብእ፡ በሕይወቱ፡ በኵሉ፡ ጊዜያት፡ ዘዓመት፡ እስከ፡ ዐሠርቱ፡ ምእት፡ ትውልድ፡ ያዐርጉ፡ ወይመጽእ፡ ሎቱ፡ ወለትውልዱ፡ እምድኅሬሁ፡ ወተጽሕፈ፡ ዐርከ፡ ወጻድቀ፡ ውስተ፡ ጽላተ፡ ሰማይ።

21ኵሎ፡ ዘንተ፡ ነገረ፡ ጸሐፍኩ፡ ለከ፡ ወአዘዝኩከ፡ ከመ፡ ትንግር፡ ለውሉደ፡ እስራኤል፡ ከመ፡ ኢይግበሩ፡ አበሳ፡ ወኢይትዐደዉ፡ ሥርዐተ፡ ወኢይንሥቱ፡ ኪዳነ፡ እንተ፡ ተሠርዐት፡ ሎሙ፡ ከመ፡ ይግበርዋ፡ ወይጸሐፉ፡ አዕርክተ።

22ወእመሰ፡ ተዐደዉ፡ ወገብሩ፡ እምኵሉ፡ ፍናዊሃ፡ ለርኵስ፡ ይጸሐፉ፡ ውስተ፡ ጽላተ፡ ሰማይ፡ ጸላእተ፡ ወይደመሰሱ፡ እመጽሐፈ፡ ሕያዋን፡ ወይጸሐፉ፡ ውስተ፡ መጽሐፈ፡ እለ፡ ይትሐጐሉ፡ ወምስለ፡ እለ፡ ይሤረዉ፡ እምውስተ፡ ምድር።

23ወበዕለተ፡ ቀተሉ፡ ውሉደ፡ ያዕቆብ፡ ሰቂማሃ፡ ዐርገ፡ ሎሙ፡ መጽሐፍ፡ ውስተ፡ ሰማይ፡ ከመ፡ ገብሩ፡ ጽድቀ፡ ወርትዐ፡ ወበቀለ፡ ላዕለ፡ ኃጥኣን፡ ወተጽሕፈ፡ ለበረከት።

24ወአውፅኡ፡ ዲናሃ፡ እኅቶሙ፡ እምነ፡ ቤተ፡ ሴኬም፡ ወፄወዉ፡ ኵሎ፡ ዘሀሎ፡ ውስተ፡ ሰቂሞን፡ አባግዒሆሙ፡ ወአልህምቲሆሙ፡ ወአእዱጊሆሙ፡ ወኵሎ፡ ንዋዮሙ፡ ወኵሎ፡ መራዕዮሙ፡ ወአምጽኡ፡ ኵሎ፡ ኀበ፡ ያዕቆብ፡ አቡሆሙ።

25ወተናገረ፡ ምስሌሆሙ፡ በእንተ፡ ዘቀተሉ፡ ሀገረ፡ እስመ፡ ፈርሀ፡ እምእለ፡ ይነብሩ፡ ምድረ፡ እምእለ፡ ከነናዊያን፡ ወፈሪዛዊያን።

26ወኮነ፡ ግርማ፡ እግዚአብሔር፡ ውስተ፡ ኵሎን፡ አህጉር፡ ዘአውዳ፡ ለሰቂሞን፡ ወኢተንሥኡ፡ ለሰዲደ፡ ውሉዶ፡ ለያዕቆብ፡ እስመ፡ ድንጋፄ፡ ወድቀ፡ ላዕሌሆሙ።