መጽሐፈ፡ ኩፋሌ 2

1ወይቤ፡ መልአከ፡ ገጽ፡ ለሙሴ፡ በቃለ፡ እግዚአብሔር፡ እንዘ፡ ይብል፡ ጸሐፍ፡ ኵሎ፡ ነገረ፡ ፍጥረት፡ ከመ፡ በሰዱስ፡ ዕለት፡ ፈጸመ፡ እግዚአብሔር፡ አምላክ፡ ኵሎ፡ ግብሮ፡ ወኵሎ፡ ዘፈጠረ፡ ወአሰንበተ፡ በዕለተ፡ ሳብዕት፡ ወቀደሳ፡ ለኵሉ፡ ዓለማት፡ ወአንበራ፡ ትእምርተ፡ ለኵሉ፡ ግብሩ።

2እስመ፡ በዕለት፡ ቀዳሚት፡ ፈጠረ፡ ሰማያተ፡ እለ፡ መልዕልት፡ ወምድረ፡ ወማያተ፡ ወኵሉ፡ መንፈስ፡ ዘይትለአክ፡ ቅድሜሁ፡ ወመላእክተ፡ ገጽኒ፡ ወመላእክተ፡ ቅዳሴ፡ ወመላእክተ፡ መንፈሰ፡ እሳት፡ ወመላእክተ፡ መንፈሰ፡ እስትንፋስ፡ ወመላእክተ፡ መንፈሰ፡ ደመናት፡ ለጽልመት፡ ወለኵሉ፡ ወለበረድ፡ ወለአስሐትያ፡ ወመላእክተ፡ ቃላት፡ ወነጐድጓዳት፡ ወለመባርቅት፡ ወመላእክተ፡ መናፍስት፡ ለቍር፡ ወለመርቄ፡ ወለክረምት፡ ወለመጸው፡ ወለማእረር፡ ወለሐጋይ፡ ወለኵሉ፡ መናፍስተ፡ ተግባሩ፡ ዘበሰማያት፡ ወዘበምድር፡ ወዘበኵሉ፡ ቀላያት፡ ወጽልመት፡ ወብርሃን፡ ወጎሕ፡ ወምሴት፡ ዘአስተዳለወ፡ በአእምሮ፡ ልቡ።

3ወአሜሃ፡ ርኢነ፡ ምግባሮ፡ ወባረክናሁ፡ ወሰባሕነ፡ ቅድሜሁ፡ በእንተ፡ ኵሉ፡ ምግባሩ፡ እስመ፡ ሰብዓተ፡ ግብረ፡ ዐበይተ፡ ገብረ፡ በቀዳሚት፡ ዕለት።

4ወበዕለተ፡ ሳኒታ፡ ገብረ፡ ምጽናዓተ፡ ማእከለ፡ ማይ፡ ወተከፍለ፡ ማያት፡ በይእቲ፡ ዕለት፡ መንፈቆሙ፡ ዐርጉ፡ ላዕለ፡ ወመንፈቆሙ፡ ወረዱ፡ መትሕተ፡ ምጽናዓት፡ ማእከለ፡ ዲበ፡ ገጻ፡ ለኵላ፡ ምድር፡ ወዘንተ፡ ባሕቲቶ፡ ግብረ፡ ገብረ፡ በሳኒታ፡ ዕለት።

5ወበሣልስት፡ ዕለት፡ ገብረ፡ በከመ፡ ይቤ፡ ለማያት፡ ይኅልፉ፡ እምቅድመ፡ ገጻ፡ ለኵላ፡ ምድር፡ ውስተ፡ መካን፡ አሐዱ፡ ወያስተርኢ፡ የብስ።

6ወገብሩ፡ ከማሁ፡ ማያት፡ በከመ፡ ይቤሎሙ፡ ወተግሕሡ፡ እምዲበ፡ ገጻ፡ ለምድር፡ ውስተ፡ መካን፡ አሐዱ፡ አፍአ፡ እምጽናዓተዝ፡ ወአስተርአየት፡ የብስ።

7ወበይእቲ፡ ዕለት፡ ፈጠረ፡ ላቲ፡ ኵሎ፡ አብሕርተ፡ በበ፡ ምጉባኢሆሙ፡ ወኵሎሙ፡ አፍላግ፡ ወምጉባኢሆሙ፡ ለማያት፡ ውስተ፡ አድባር፡ ወውስተ፡ ኵሉ፡ ምድር።

8ወበዕለተ፡ ራብዕት፡ ገብረ፡ እግዚአብሔር፡ ፀሐየ፡ ወወርኀ፡ ወከዋክብተ፡ ወአንበሮሙ፡ ውስተ፡ ምጽናዓተ፡ ሰማይ፡ ከመ፡ ያብርሁ፡ ውስተ፡ ኵሉ፡ ምድር።

9ወወሀበ፡ እግዚአብሔር፡ ፀሐየ፡ ለትእምርት፡ ዐቢይ፡ ዲበ፡ ምድር፡ ለመዋዕል፡ ወለሰንበት፡ ወለአውራኅ፡ ወለበዓላት፡ ወለዓመታት፡ ወለሰንበታተ፡ ዓመታት፡ ወለኢዮቤልዉሳት፡ ወለኵሉ፡ ጊዜ፡ ለዓመታት።

10ወይፈልጥ፡ ማእከለ፡ ብርሃን፡ ወማእከለ፡ ጽልመት፡ ወለጥዕዮ፡ ከመ፡ ይጥዒ፡ ኵሉ፡ ዘይሠርፅ፡ ወይልህቅ፡ ዲበ፡ ምድር።

11ወበዕለተ፡ ኃምስት፡ ፈጠረ፡ ዐናብርተ፡ ዐበይተ፡ ማእከለ፡ ቀላያተ፡ ማያት፡ እስመ፡ ዝንቱ፡ ተገብረ፡ ቀዳሚ፡ በእደዊሁ፡ ዘሥጋ፡ ወኵሉ፡ ዘይትሐወስ፡ ውስተ፡ ማያት፡ ዓሣት፡ ወኵሉ፡ ዘይሰርር፡ አዕዋፈ፡ ወኵሎ፡ ዘመዶሙ።

12ወሠረቀ፡ ፀሐይ፡ ላዕሌሆሙ፡ ለጥዒና፡ ወላዕለ፡ ኵሉ፡ ዘሀሎ፡ ውስተ፡ ምድር።

13ወበዕለተ፡ ሳድስት፡ ገብረ፡ ኵሎ፡ አራዊተ፡ ምድር፡ ወኵሎ፡ እንስሳ፡ ወኵሎ፡ ዘይትሐወስ፡ ዲበ፡ ምድር።

14ወእምድኅረ፡ ዝኵሉ፡ ገብረ፡ ሰብአ፡ አሐደ፡ ብእሴ፡ ወብእሲተ፡ ገብሮሙ፡ ወአስለጦ፡ ለኵሉ፡ ዘዲበ፡ ምድር፡ ወዘውስተ፡ አብሕርት፡ ወዲበ፡ ዘይሰርር፡ ወዲበ፡ አራዊት፡ ወዲበ፡ እንስሳ፡ ወዲበ፡ ኵሉ፡ ዘይትሐወስ፡ ዲበ፡ ምድር፡ ወላዕለ፡ ኵሉ፡ ምድር፡ ወዲበ፡ ዝኵሉ፡ አስለጦ።

15ወኮነ፡ ኵሉ፡ ዕሥራ፡ ወክልኤቱ፡ ዘመድ።

16ወፈጸመ፡ ኵሎ፡ ግብሮ፡ በዕለተ፡ ሳድስት፡ ኵሎ፡ ዘበሰማይ፡ ወዘበምድር፡ ወውስተ፡ አብሕርት፡ ወውስተ፡ ቀላያት፡ ወውስተ፡ ብርሃን፡ ወውስተ፡ ጽልመት፡ ወውስተ፡ ኵሉ።

17ወወሀበነ፡ ትእምርተ፡ ዐቢየ፡ ዕለተ፡ ሰንበታት፡ ከመ፡ ንኩን፡ እንዘ፡ ንገብር፡ ሰዱሰ፡ ዕለተ፡ ግብረ፡ ወናሰንብት፡ አመ፡ ዕለተ፡ ሳብዕት፡ እምኵሉ፡ ግብር።

18ኵሎሙ፡ መላእክተ፡ ገጽ፡ ወኵሎሙ፡ መላእክተ፡ ቅድሳት፡ ክልኤተ፡ ዘመደ፡ ዐበይተ፡ ዘንተ፡ ይቤለነ፡ ናሰንብት፡ ምስሌሁ፡ በሰማይ፡ ወበምድር።

19ወይቤለነ፡ ናሁ፡ አነ፡ እፈልጥ፡ ሊተ፡ ሕዝበ፡ እማእከለ፡ አሕዛብየ፡ ወያሰነብቱ፡ እሙንቱኒ፡ ወእቄድሶ፡ ሊተ፡ ለሕዝብ፡ ወእባርኮ፡ በከመ፡ ቀደስክዋ፡ ለዕለተ፡ ሰንበት፡ ወእቄድሶ፡ ሊተ፡ ወከመዝ፡ እባርኮ፡ ወይከውኑኒ፡ ሕዝብየ፡ ወአነ፡ እከውኖሙ፡ አምላከ።

20ወኀረይኩ፡ በዘርአ፡ ያዕቆብ፡ በኵሉ፡ እምዘርኢኩ፡ ወጸሐፍክዎ፡ ሊተ፡ ወልደ፡ በኵረ፡ ወቀደስክዎ፡ ሊተ፡ ለዓለመ፡ ዓለም።

21ወግብረ፡ ቦቱ፡ ትእምርተ፡ ከማሁ፡ በዘ፡ ያሰነብቱ፡ እሙንቱኒ፡ ምስሌነ፡ በዕለተ፡ ሳብዕት፡ ለበሊዕ፡ ወለሰቲይ፡ ወለባርኮ፡ ዘፈጠረ፡ ኵሎ፡ በከመ፡ ባረኮ፡ ወቀደሶ፡ ሎቱ፡ ሕዝበ፡ ዘያስተርኢ፡ እምኵሉ፡ አሕዛብ፡ ወከመ፡ ያሰንብቱ፡ ኅቡረ፡ ምስሌነ።

22ወገብረ፡ ፈቃዳቲሁ፡ ይዕርግ፡ መዓዛ፡ ሠናይ፡ ዘይትወከፍ፡ ቅድሜሁ፡ ኵሎ፡ መዋዕለ።

23ዕሥራ፡ ወክልኤ፡ አርእስተ፡ ሰብእ፡ እምአዳም፡ እስከኔሁ።

24ወተውህበ፡ ለዝንቱ፡ ከመ፡ ይኩኑ፡ ኵሎ፡ መዋዕለ፡ ቡሩካነ፡ ወቅዱሳነ።

25ፈጠረ፡ ሰማየ፡ ወምድረ፡ ወኵሎ፡ ዘተፈጥረ፡ በሰዱስ፡ ዕለት።

26ወአንተ፡ አዝዝ፡ ለደቂቀ፡ እስራኤል፡ ወይዕቀቡ፡ ዕለተ፡ ዛቲ፡ ይቀድስዋ፡ ወከመ፡ ኢይግበሩ፡ ባቲ፡ ኵሎ፡ ግብረ፡ ወከመ፡ ኢያርኵስዋ፡ እስመ፡ ቅድስት፡ ይእቲ፡ እምኵሉ፡ መዋዕል።

27ኵሉ፡ ዘያጌምና፡ ሞተ፡ ይሙት፡ ወኵሉ፡ ዘይገብር፡ ባቲ፡ ኵሎ፡ ግብረ፡ ሞተ፡ ይሙት፡ ለዓለም።

28ወኵሉ፡ ሰብእ፡ ዘየዐቅብ፡ ወያሰነብት፡ ባቲ፡ እምኵሉ፡ ግብሩ፡ ቅዱሰ፡ ወቡሩከ፡ ይከውን፡ በኵሉ፡ መዋዕል፡ ከማነ።

29አይድዕ፡ ወንግር፡ ለደቂቀ፡ እስራኤል፡ ኵነኔሃ፡ ለዛቲ፡ ዕለት፡ ወያሰንብቱ፡ ባቲ፡ ወኢይኅድግዋ፡ በስሕተተ፡ ልቦሙ፡ ከመ፡ ኢይኩኑ፡ ለገቢረ፡ ግብር፡ ባቲ፡ ዘኢይከውን፡ ዘያስተርኢ፡ ለገቢረ፡ ባቲ፡ ፈቃዶሙ።

30ወኢያውፅኡ፡ ወኢያብኡ፡ እምቤት፡ ቤተ፡ በዛቲ፡ ዕለት፡ እስመ፡ ቅድስት፡ ይእቲ፡ ወቡርክት፡ ይእቲ፡ እምኵሉ፡ ዕለተ፡ ኢዮቤል፡ ዘኢዮቤልዉሳት፡ ባቲ፡ አሰንበትነ፡ በሰማያት፡ ዘእንበለ፡ ይትአመር፡ ለኵሉ፡ ዘሥጋ፡ ለአሰንብቶ፡ ባቲ፡ በምድር።

31ወባረከ፡ ፈጣሬ፡ ኵሉ፡ ወኢቀደሰ፡ ኵሎ፡ ሕዝበ፡ ወአሕዛበ፡ ለአሰንብቶ፡ ባቲ፡ ዘእንበለ፡ እስራኤልሃ፡ ባሕቲቶ፡ ሎቱ፡ ለባሕቲቱ፡ ወሀቦ፡ ይብልዑ፡ ወይስተዩ፡ ወለአሰንብቶ፡ ባቲ፡ ዲበ፡ ምድር።

32ወባረካ፡ ፈጣሬ፡ ኵሉ፡ ዘፈጠረ፡ ዛተ፡ ዕለተ፡ ለበረከት፡ ወለቅድሳት፡ ወለስብሐት፡ እምኵሉ፡ መዋዕል።

33ዝንቱ፡ ሕግ፡ ወስምዕ፡ ተውህበ፡ ለደቂቀ፡ እስራኤል፡ ሕግ፡ ዘለዓለም፡ ለትውልዶሙ።