መጽሐፈ፡ ኩፋሌ 21

1ወበሳድስ፡ ዓመት፡ ዘሳብዕ፡ ሱባዔ፡ ዘዝንቱ፡ ኢዮቤልዉ፡ ጸውዐ፡ አብርሃም፡ ይስሐቅሃ፡ ወልዶ፡ ወአዘዞ፡ እንዘ፡ ይብል፡ አነ፡ ረሳእኩ፡ ወኢያአምር፡ ዕለተ፡ ሞትየ፡ እስመ፡ ጸገብኩ፡ መዋዕልየ።

2ወናሁ፡ አነ፡ ወልደ፡ ምእት፡ ወሰብዓ፡ ወኀምስቱ፡ ዓመት፡ ወበኵሉ፡ መዋዕለ፡ ሕይወትየ፡ ሀሎኩ፡ እንዘ፡ እዜከሮ፡ ለእግዚአብሔር፡ ወእንዘ፡ አኀሥሥ፡ በኵሉ፡ ልብየ፡ ከመ፡ እግበር፡ ፈቃዳቲሁ፡ ወከመ፡ አርትዕ፡ ሐዊረ፡ በኵሉ፡ ፍናዊሁ።

3ጣዖተ፡ ጸልአት፡ ነፍስየ፡ ከመ፡ እትዓቀብ፡ ለገቢረ፡ ፈቃዱ፡ ለዘ፡ ፈጠረኒ።

4እስመ፡ አምላክ፡ ሕያው፡ ውእቱ፡ ወቅዱስ፡ ውእቱ፡ ወምእመን፡ ወጻድቅ፡ ውእቱ፡ እምኵሉ፡ ወአልቦ፡ በኀቤሁ፡ ነሢአ፡ ገጽ፡ ወነሢአ፡ ሕልያን፡ እስመ፡ አምላክ፡ ጻድቅ፡ ውስቱ፡ ወገባሬ፡ ኵነኔ፡ ውእቱ፡ እምኵሎሙ፡ እለ፡ ይትዐደዉ፡ ትእዛዞ፡ ወለእለ፡ ይሜንኑ፡ ኪዳኖ።

5ወአንተኒ፡ ወልድየ፡ ዕቀብ፡ ትእዛዞ፡ ወሥርዓቶ፡ ወኵነኔሁ፡ ወኢትሖር፡ ድኅሬሆሙ፡ ለርኩሳን፡ ወድኅሬሆሙ፡ ለግልፎ፡ ወድኅሬሆሙ፡ ለስብኮ።

6ወኢትብላዕ፡ ምንተኒ፡ ደመ፡ ዘአርዌ፡ ወእንስሳ፡ ወዘኵሉ፡ ዖፍ፡ ዘይሰርር፡ ውስተ፡ ሰማይ።

7ወለእመ፡ ኀረድከ፡ ኅርድ፡ ለጽንሐሐ፡ ሰላም፡ ዘይሰጠው፡ ኅርድዎ፡ ወደሞሙ፡ ትክዕዉ፡ ውስተ፡ ምሥዋዕ፡ ወኵሎ፡ ስብሐ፡ ጽንሐሕ፡ ታዐርግ፡ ውስተ፡ ምሥዋዕ፡ ምስለ፡ ስንዳሌ፡ ወመሥዋዕተ፡ ልዉስ፡ በቅብእ፡ ምስለ፡ ሞጻሕቱ፡ ታዐርጎ፡ ኵሎ፡ ኅቡረ፡ ዲበ፡ ምሥዋዕ፡ ጽንሐሐ፡ መዓዛ፡ ሠናይ፡ ቅድመ፡ እግዚአብሔር።

8በከመ፡ ስብሐ፡ መሥዋዕተ፡ መድኃኒት፡ ታነብር፡ ዲበ፡ እሳት፡ ዘዲበ፡ መሥዋዕት፡ በከመ፡ ስብሕ፡ ዘዲበ፡ ከርሥ፡ ወኵሎ፡ ስብሐ፡ ዘዲበ፡ ንዋየ፡ ውስጥ፡ ወክልኤ፡ ኵልያተ፡ ወኵሎ፡ ስብሐ፡ ዘዲቤሆሙ፡ ወዘዲበ፡ መናቅዕ፡ ወከብድ፡ ምስለ፡ ኵልያት፡ ጥብሉለ።

9ወታዐርግ፡ ዘንተ፡ ኵሎ፡ ለመዓዛ፡ ሠናይ፡ ዘይሰጠው፡ ቅድመ፡ እግዚአብሔር፡ ምስለ፡ መሥዋዕቱ፡ ወምስለ፡ ሞጻሕቱ፡ ከመዓዛ፡ ሠናይ፡ ኅብስተ፡ ጽንሐሕ፡ ለእግዚአብሔር።

10ወሥጋሁ፡ ብላዕ፡ በይእቲ፡ ዕለት፡ ወበሳኒታ፡ ወኢይዕረብ፡ ላዕሌሁ፡ ፀሐይ፡ ዘአመ፡ ሳኒታ፡ እስከ፡ ሶበ፡ ይትበላዕ፡ ወኢይትርፍ፡ ለዕለት፡ ሣልስት፡ እስመ፡ ኢይሠጠዎ፡ እስመ፡ ኢኮነ፡ ኅሩየ፡ ወኢይትበሀል፡ እንከ።

11ውስተ፡ ኵሉ፡ ምሥዋዓቲከ፡ ትደይ፡ ፄወ፡ ወኢይጸራዕ፡ ኪዳነ፡ ፄው፡ ውስተ፡ ኵሉ፡ ምስዋዓቲከ፡ ቅድመ፡ እግዚአብሔር።

12ወተዐቀብ፡ በዕፀወ፡ መሥዋዕት፡ ከመ፡ ኢታብእ፡ ዕፀወ፡ ዲበ፡ ምሥዋዕ፡ ዘንተ፡ ክመ፡ ቄጳርሶን፡ ወዴፍራን፡ ወሶጋድ፡ ወሰጠሮቢሎን፡ ወጲጢን፡ ወቄድሮን፡ ወቡራቲ፡ ወታናክ፡ ወዕፀ፡ ዘይት፡ ምርስኔ፡ ወድፍን፡ ወቄዳር፡ ዘስሙ፡ አርባት፡ ወቤስም።

13ወእምእሉ፡ ዕፀው፡ አንብር፡ መትሕተ፡ ጽንሐሕ፡ ዲበ፡ ምሥዋዕ፡ ምኩረ፡ ርእዮሙ፡ ወኢታንብር፡ ኵሎ፡ ዕፀ፡ ንቁዐ፡ ወሬዋ፡ ዕፀወ፡ ጽኑዓነ፡ ወጽኑዐ፡ ዘአልቦ፡ ምንተኒ፡ ነውረ፡ ፍጹመ፡ ወሐደስተ፡ ተክለ፡ ወኢታንብር፡ ዕፀ፡ ብሉየ፡ እስመ፡ ወፅአ፡ መዓዛሁ፡ እስመ፡ እንከ፡ አልቦ፡ መዓዛ፡ ላዕሌሁ፡ ከመ፡ ቀዳማዊ።

14ዘእንበለ፡ እሉ፡ ዕፀው፡ አልቦ፡ ዘታነብር፡ ባዕደ።

15ዑቅ፡ ዛትእዛዘ፡ ወግበራ፡ ወልድየ፡ ከመ፡ ታርትዕ፡ በኵሉ፡ ግብርከ።

16ወበኵሉ፡ ጊዜ፡ ኩን፡ ንጹሐ፡ በሥጋከ፡ ወኅዕብ፡ በማይ፡ ዘእንበለ፡ ትሖር፡ ለአዕርጎ፡ ውስተ፡ ምሥዋዕ፡ ወኅፅብ፡ እዴከ፡ ወእግረከ፡ ዘእንበለ፡ ትቅረብ፡ ውስተ፡ መሥዋዕት፡ ሶበ፡ ፈጸምከ፡ አዕርጎ፡ ግባእ፡ ወተኀፀብ፡ እደዊከ፡ ወእገሪከ።

17ወኢያስተርኢ፡ በዲቤክሙ፡ ኵሉ፡ ደም፡ ወውስተ፡ አልባሲክሙ፡ ተዐቀብ፡ ወልድየ፡ በደም፡ ተዐቀብ፡ ጥቀ፡ ድፍኖ፡ ምድረ።

18ወኢትብልዑ፡ እንከ፡ ደመ፡ እስመ፡ ደም፡ ነፍስ፡ ይእቲ፡ ወኢትብላዕ፡ ምንተኒ፡ ደመ።

19ወኢትንሣእ፡ ሕልያነ፡ ዲበ፡ ኵሉ፡ ደመ፡ ሰብእ፡ ከመ፡ ኢይትከዐው፡ በከ፡ ዘእንበለ፡ ኵነኔ፡ እስመ፡ ደም፡ ውእቱ፡ ዘይትከዐው፡ ያኀጥኣ፡ ለምድር፡ ወደም፡ ኢትክል፡ ነጺሐ፡ እምደመ፡ ሰብእ፡ ዘእንበለ፡ በደመ፡ ዘከዐዎ።

20ወኢትንሣእ፡ ሕልያነ፡ ወአምኃ፡ በደመ፡ ሰብእ፡ ደመ፡ በደም፡ ወይሠጠው፡ ቅድመ፡ አምላክ፡ ልዑል።

21እሬኢ፡ አነ፡ ወልድየ፡ ኵሎ፡ ግብረ፡ እጓለ፡ እመሕያው፡ ከመ፡ ኃጢአት፡ ወእከይ፡ ወኵሉ፡ ግብሮሙ፡ ርኵስ፡ ወምናኔ፡ ወግማኔ።

22ተዐቀብ፡ ኢትሖር፡ ውስተ፡ ፍኖቶሙ፡ ወለከይደ፡ አሰሮሙ፡ ወኢትስሐት፡ ስሕተተ፡ ለሞት፡ ቅድመ፡ አምላክ፡ ልዑል።

23ረገሐሥ፡ እምኵሉ፡ ምግባሪሆሙ፡ ወእምኵሉ፡ ርኵሶሙ፡ ወተዐቀብ፡ ዑቃቤ፡ ዘአምላክ፡ ልዑል፡ ወግበር፡ ፈቃዳቲሁ፡ ወታረትዕ፡ በኵሉ።

24ወይባርከከ፡ በኵሉ፡ ምግባሪከ፡ ወያነሥእ፡ እምኔከ፡ ተክለ፡ ጽድቅ፡ በኵሉ፡ ምድር፡ በኵሉ፡ ትውልደ፡ ምድር፡ ወኢይትረመም፡ ስምየ፡ ወስምከ፡ በመትሕተ፡ ሰማይ፡ በኵሉ፡ መዋዕል።

25ሖር፡ ወልድየ፡ በሰላም፡ ያጽንዕከ፡ አምላክ፡ ልዑል፡ አምላኪየ፡ ወአምላክከ፡ ለገቢረ፡ ፈቃዳቲሁ፡ ወይባርክ፡ ኵሎ፡ ዘርእከ፡ ተርፈ፡ ዘርእከ፡ ለትውልድ፡ ዘለዓለም፡ በኵሉ፡ በረከተ፡ ጽድቅ፡ ከመ፡ ትኩን፡ በረከተ፡ በኵሉ፡ ምድር።

26ወወፅአ፡ እምኀቤሁ፡ እንዘ፡ ይትፌሣሕ።