መጽሐፈ፡ ኩፋሌ 42

1ወበቀዳሚ፡ ዓመት፡ ዘሱባዔ፡ ሣልስ፡ ዘአርብዓ፡ ወኀምስቱ፡ ኢዮቤልው፡ አኀዘ፡ ዐባር፡ ይምጻእ፡ ውስተ፡ ምድር፡ ወአበየ፡ ዝናም፡ ተውህቦ፡ ለምድር፡ እስመ፡ አልቦ፡ ምንተኒ፡ ዘይወርድ።

2ወዐብረት፡ ምድር።

3ወመጽኡ፡ ግብጽ፡ ኀበ፡ ዮሴፍ፡ ከመ፡ የሀቦሙ፡ ሲሲተ፡ ወከሠተ፡ መዛግብተ፡ ኀበ፡ ሀሎ፡ ሥርናይ፡ ዘቀዳሚ፡ ዓመት፡ ወሤጠ፡ ለአሕዛበ፡ ምድር፡ በወርቅ።

4ወሰምዐ፡ ያዕቆብ፡ ከመ፡ ቦቱ፡ ሲሲተ፡ ውስተ፡ ግብጽ፡ ወፈነወ፡ ዐሠርተ፡ ደቆ፡ ከመ፡ ይንሥኡ፡ ሎቱ፡ ሲሲተ፡ በግብጽ፡ ወብንያምሃሰ፡ ኢፈነወ።

5ወአእመሮ፡ ዮሴፍ፡ ወእሙንቱሰ፡ ኢያእመርዎ።

6ወእምዝ፡ ፈትሖሙ፡ ወአቀመ፡ ስምዖንሃ፡ ባሕቲቶ፡ ወተስዐተ፡ አኀዊሁ፡ ፈነወ።

7ወመልአ፡ አሕስሊሆሙ፡ ሥርናየ፡ ወወርቆሙሂ፡ ወደየ፡ ሎሙ፡ ውስተ፡ አሕስሊሆሙ፡ ወኢያእመሩ።

8ወአዘዞሙ፡ ከመ፡ ያምጽኡ፡ እኅዋሆሙ፡ ዘይንእስ፡ እስመ፡ ነገርዎ፡ ከመ፡ ሀሎ፡ አቡሆሙ፡ ሕያው፡ ወእኁሆሙ፡ ዘይንእስ።

9ወዐርጉ፡ እምድረ፡ ግብጽ፡ ወበጽሑ፡ ምድረ፡ ከናአን፡ ወነገሩ፡ ለአቡሆሙ፡ ኵሎ፡ ዘከመ፡ ረከቦሙ፡ ወእፎ፡ ተናገረ፡ ምስሌሆሙ፡ መኰንነ፡ ብሔር፡ ዐጸብጺበ፡ ወአኀዞ፡ ለስምዖን፡ እስከ፡ ሶበ፡ ያመጽእዎ፡ ለብንያም።

10ወይቤ፡ ያዕቆብ፡ አምከንክሙኒኬ፡ ወዮሴፍኒ፡ ኢሀሎ፡ ወስምዖንሂ፡ ኢሀሎ፡ ወብንያምሃኒ፡ ትነሥእዎ፡ ላዕሌየኬ፡ ኮነ፡ እከይክሙ።

11ወይቤ፡ ኢየሐውር፡ ወልድየ፡ ምስሌክሙ፡ እመቦ፡ ከመ፡ ደወየ።

12እስመ፡ ርእየ፡ ከመ፡ ገብአ፡ ወርቆሙ፡ ኵሉ፡ በዕቈሪሁ፡ ወበዝ፡ ፈርሀ፡ ፈንዎቶ።

13ወዐባርኒ፡ በዝኀ፡ ወኀየለ፡ በምድረ፡ ከናአን፡ ወበኵሉ፡ ምድር፡ ዘእንበለ፡ ምድረ፡ ግብጽ።

14ወተሴሰይዎ፡ ሰብአ፡ ግብጽ፡ በቀዳሚ፡ ዓመት፡ ዘዐባር።

15ወሶበ፡ ርእየ፡ እስራኤል፡ ከመ፡ ኀየለ፡ ጥቀ፡ ዐባር፡ ውስተ፡ ምድር፡ ወአልቦ፡ ድኂነ፡ ወይቤ፡ ለውሉዱ፡ ሖሩ፡ ግብኡ፡ ወንሥኡ፡ ለነ፡ ሲሲተ፡ ኢንሙት።

16ወይቤሉ፡ ኢነሐውር፡ እመ፡ ኢመጽአ፡ እኁነ፡ ዘይንእስ፡ ምስሌነ፡ ኢነሐውር።

17ወርእየ፡ እስራኤል፡ ከመ፡ እመ፡ ኢፈነዎ፡ ምስሌሆሙ፡ ይትሐጐሉ፡ ኵሎሙ፡ እምቅድመ፡ ዐባር።

18ወይቤ፡ ሮቤል፡ ሀበንዮ፡ ውስተ፡ እዴየ፡ ወለእመ፡ ኢያግባእክዎ፡ ለከ፡ ቅትል፡ ክልኤተ፡ ውሉድየ፡ ህየንተ፡ ነፍሰ፡ ዚአሁ።

19ወቀርበ፡ ይሁዳ፡ ወይቤ፡ ፈንዎ፡ ምስሌነ፡ ወለእመ፡ ኢያግባእክዎ፡ ለከ፡ እቡሰ፡ እኩን፡ በቅድሜከ፡ ኵሎ፡ መዋዕለ፡ ሕይወትየ።

20ወፈነዎ፡ ምስሌሆሙ፡ በካልእ፡ ዓመት፡ ዘዝ፡ ሱባዔ፡ በሠርቀ፡ ወርኅ፡ ወበጽሑ፡ ብሔረ፡ ግብጽ፡ ምስለ፡ ኵሎሙ፡ እለ፡ የሐውሩ፡ ወአምኃሆሙ፡ ውስተ፡ እደዊሆሙ፡ ማየ፡ ልብን፡ ወከርካዕ፡ ወጤሬቤንቶስ፡ ወጸቃውዐ፡ መዓር።

21ወበጽሑ፡ ወቆሙ፡ ቅድመ፡ ዮሴፍ፡ ወርእየ፡ ብንያምሃ፡ እኅዋሁ፡ ወአእመሮ፡ ወይቤሎሙ፡ ዝኑ፡ እኁክሙ፡ ዘይንእስ፡ ወይቤልዎ፡ ውእቱ።

22ወፈነዎ፡ ውስተ፡ ቤቱ፡ ወስምዖንሃኒ፡ አውጽአ፡ ሎሙ።

23ወበልዑ፡ በቅድሜሁ፡ ወወሀቦሙ፡ ክፍለ፡ ለኵሎሙ፡ ወበዝኀ፡ መክፈልተ፡ ብንያም፡ እመክፈልተ፡ ኵሎሙ፡ ትስብዕተ።

24ወበልዑ፡ ወሰትዩ፡ ወተንሥኡ፡ ወኀደሩ፡ ኀበ፡ አእዱጊሆሙ።

25ወኀለየ፡ ዮሴፍ፡ ኅሊና፡ በዘ፡ ያአምር፡ ኅሊናሆሙ፡ እመቦ፡ ኅሊና፡ ሰላም፡ በበይናቲሆሙ።