Halelu 104

1E Iehova, e kuu Akua e, ua nui loa no oe; Ua kahikoia no oe i ka nani a me ka hanohano.

2Ua uhiia no oe i ka malamalama me he kapa la; Ua hohola no oe i na lani me he paku la.

3Ua haua no oia i kona mau keena kiekie ma na wai; Ua kau aku no hoi i na ao maluna i kaa mau nona: A ua holoholo me na eheu o ka makani.

4Ua hana oia i kona poe elele, he makani; A i kona poe kahuns hoi, he lapalapa ahi;

5Ua hoopaa oia i ka honua maluna o kona kumu, I ole ia e nauweuwe, a mau loa aku.

6A ua uhi no oe ia i ka hohonu, me he kapa la: Ku mai la na wai, maluna o na mauna.

7I kou papa ana, holo no lakou; I ka leo o kou hekili, auhee aku la lakou.

8Ea mai la no maluna o na mauna; A emi iho la ma na awawa ilalo, A i kahi au i hookumu ai no lakou.

9Ua kau pale oe i mokuna no lakou. I ole lakou e hala'e; I ole hoi e hoi hou mai, a uhi i ka honua.

10Kuu mai la oia i na waipuna ma na awawa, I kahe mai lakou, mawaena o na mauna.

11Hoohainu no lakou i na holoholona a pau o ke kula; A hooana no hoi na hoki hihiu i ko lakou makewai.

12Maluna olaila na manu o ka lewa e hoopunana'i, A kani hoi ko lakou leo iwaena o na lala.

13Ua hoomauu mai no oia i ua mauna, mailoko mai o kona waihonawai; Ua maona hoi ka aina i ka hua o kau hana ana.

14Nana no i hooulu mai ka mauu no na holoholona, A me ka mea uli hoi i pono ai na kanaka: I hoopuka mai ai oia i ka ai mailoko mai o ka honua,

15A me ka waina hoi i mea e olioli ai ko na kanaka naau, A me ka aila hoi, i mea e hinuhinu ai kana maka, A me ka berena, ka mea e hooikaika ai ka naau o na kanaka.

16Ua kena no na laau o Iehova, Na kedera hoi o Lebanona, na mea ana i kanu ai;

17Malaila no e hoopunana'i na manu; O ke kikonia, o na laau kaa kona hale.

18O na mauna kiekie ka puuhonua o na kao hihiu; A o na pohaku hoi ko na rabita.

19Nana no i hana i na mahina no na kau; Ua ike no ka la i kona napoo ana.

20Lawe mai no oe i ka pouli, a ua po; Ia manawa, kolo mai na mea kolo a pau o ka nahelehele.

21Uwo mai la hoi na liona opiopio i ko lakou wahi, A imi hoi i ka ai, mai ke Akua mai.

22Puka mai la ka la, alaila, akoakoa lakou, A moe no lakou, ma ko lakou ana.

23Hele aku no ke kanaka i kana hana, A i kona hooikaika hoi, a ahiahi.

24Nani ka nui o kau mau hana, e Iehova! Ma ke akamai i hana mai ai oe ia mau mea a pau: Ua piha hoi ka honua i kau waiwai.

25A me keia moana nui hoi, a palahalaha, Malaila no na mea kolo, pau ole i ka heluia, A me na mea ola, he liilii, a he nui no hoi.

26Malaila no na moku e holo ae; Aia hoi kela leviatana au i hana'i, e paani ilaila.

27Kakali no keia poe a pau ia oe, I haawi mai ai oe i ka lakou ai i ka wa pono.

28O ka mea au e haawi mai ai na lakou, oia ka lakou e hooiliili iho; Wehe no oe i kou lima, a lako iho la lakou i ka maikai.

29I huna oe i kou maka, make koke iho la lakou; Lawe oe i ko lakou ea, make no lakou, a hoi hou i ka lepo.

30Hoouna mai oe i kou ea, ua hanaia iho la lakou; A nau no hoi i hoano hou i ka mnka o ka honua.

31E mau loa ana no ka nani o Iehova; E lealea mai no o Iehova i kana mau hana.

32Nana mai no oia i ka honua, a haalulu iho la ia; Hoopa mai oia i na mauna, uwahi ae la lakou.

33E oli aku au ia Iehova i ka manawa o ko'u ola ana; E hoolea no hoi au i ke Akua, a i ko'u hopena,

34He mea ono ko'u noonoo ana ia ia; A ma Iehova no wau e lealea ai.

35E hookiia'e ka poe hewa mai ka honua aku, O ka poe lawehala hoi, aole e koe lakou. E hoomaikai aku ia Iehova, e kuu uhane: E halelu aku oukou ia Iehova.