Ioanej 2

1A NI kajilu en ran kamadip en kapapaud wiaui Kana nan Kaliliia; a in en Iejuj kot waja o.

2Iejuj o japwilim a tounpadak kan me pil luke don kamadip o.

3Arail wain lao rojelar, in en Iejuj ap majani on i: Jolar arail wain.

4Iejuj kotin majani on i: Li, menda re om? Ai anjau jai kenta leler.

5In a ap majani on papa kan: Komail wiada meakaroj, me a pan kotin majani on komail.

6Ari, potel takai wonu mi waja o, en Juj akan ar men dopedop lole. Eu me laude on metreten riau de jilu.

7Iejuj kotin majani on irail: Komail idip on pil en potel akan! Irail ari kodiada lel au ar.

8A ap kotin majani on irail: Deukada, wala ren me kaun en konot i Irail ap wala.

9Kaun en konot lao jon kij pil, me wia wain la, o jo aja, a idipi jan ia, a papa kan, me idip pil da, aja. Kaun en konot ap ekeredo ol kamod o,

10Indan i: Aramaj karoj kin kida maj wain mau, toun kamadip lao medilar, re kin kida, me jota non mau. A komui kin nekinekid wain mau lel met.

11I met tapidan kilel akan, me Iejuj kotin wiadar Kana nan Kaliliia, o kotin kajaleda a linan, o japwilim a tounpadak kan pojonla i.

12A murin met a kotidilan Kapernaum, i o in a, o ri a ol akan, o japwilim a tounpadak kan, ari, jota non ran toto, me re kotikot waja o.

13A paja en Juj akan me korendor, a Iejuj kotidalan Ierujalem.

14A kotin majani nan im en kaudok men netinet en kau, o jip, o muroi, o men wiliandi moni me momod ia.

15Ap kotin wiakida men wokiwok jal akai, ap woki ir jan nan im en kaudok ianaki jip o kau akan, o moni en jaunwiliandi a kotin kajapokela o kotin wuke didi tepel akan.

16Ap kotin majani on men netinet en muroi kan: Wawei jan met met akan, o der wiakidar tanpaj en Jam ai im en net eu!

17A japwilim a tounpadak kau tamanda me intinidier: Limpok on tanpaj omui me kajor ia dier.

18Juj oko ap japen indan i: Kilel da, me kom kadedeki on kit, me komui manaman on, en wiada mepukat?

19Iejuj kotin japen majani on irail: Palana pajan im en kaudok wet, a pon jili pon I pan kauada.

20Juj oko ap indada: Par naulwonu me im en kaudok wet wiaui kidar, a pon jili pon komui pan kaua kida?

21Ari, tanpaj en pali war a, me a kotin majanie kida.

22A lao iajadar jan a matalar, japwilim a tounpadak kan ap tamandar, me a kotin majanier mepukat. Irail ari pojon kijin likau kan o majan, me Iejuj kotin majaniadar.

23Ni a kotikot Ierujalem ni paja, ni kamadip o, me toto pojonla mar a, ni ar kilaner kilel akan, me a kotin wiadar.

24A Iejuj jota kotin liki on ir pein i, pwe a kotin mani irail karoj.

25O a jota mau on, meamen en kadede on i aramaj amen, pwe pein i kotin mani lol en aramaj.