Ioba 22

1A LAILA olelo aku o Elipaza, i aku la,

2E hiki anei i ke kanaka, ke hoopomaikai i ke Akua, E like me ka mea naauao, e hoopomaikai ia ia iho?

3He mea oluolu anei ke pono oe i ka Mea mana? A e waiwai anei oia ke hoohemolele oe i kou mau aoao?

4No ka makau ia oe, e hoopaapaa mai anei ia ia oe? E hele mai anei ia me oe ma ka hooponopono ana?

5Aole anei he nui kou hewa? A ua hope ole kou mau hala?

6No ka mea, ua hoopanai wale oe i kou hoahanau, A ua lawe oe i na aahu o ka poe kapa ole.

7Aole oe i haawi i ka wai i ka mea nawaliwali, A ua ana oe i ka berena i ka mea pololi.

8Aka, o ke kanaka ikaika, nona ka honua; A noho iho la ka mea koikoi ilaila.

9Ua hoihoi nele aku oe i na wahinekanemake, A ua paopaoia na lima o na mea makua ole.

10Nolaila ua puni oe i na pahele, A o ka makau wale ke hooweliweli mai nei ia oe;

11A o ka pouli paha au i ike ole ai; A he nui loa ka wai e halana ana maluna ou.

12Aole anei ke Akua ma ka lani kiekie? Aia hoi, ke poo o na hoku, ua kiekie lakou.

13A i mai la oe, Pehea la ke Akua e ike ai? E hiki anei ia ke hooponopono mawaena mai o ke ao pouli?

14O na ao naulu ka uhi nona, i ike ole ai ia, A hele no ia ma ka poai o ka lani.

15Ua noonoo pono anei oe i ka aoao kahiko, Kahi a ka poe hewa i hele ai?

16Ka poe i noopauia mamua o ka manawa, Ua nininiia ke kaiakahinalii maluna o ko lakou kahua;

17Ka poe i olelo aku i ke Akua, E hele mai o makou aku; A heaha ka ka Mea mana e hana mai ai no lakou?

18Ua hoopiha no nae ia i ko lakou mau hale i ka waiwai; Aka. o ka manao o ka poe hewa ua mamao loa aku ia ia'u.

19Ua ike no ka poe pono ia, a olioli, A akaaka ka poe hala ole ia lakou.

20Ina paha ua lukuia ko makou poe enemi, A ua hoopauia ka waiwai nui o lakou i ke ahi.

21E hookuikahi ae me ia ano, a e pomaikai; Pela no e hiki mai ai ka pomaikai ia oe.

22Ke koi aku nei au ia oe, E lawe oe i ke kanawai mai kona waha mai, A e waiho oe i kana mau olelo iloko o kou naau.

23Ina e hoi hou oe i ka Mea mana, e kukuluia oe, E hoomamao loa aku oe i ka hewa mai kou mau halelewa aku.

24A e hoolei aku oe i kou houlunlu ana i ke gula i ka lepo, A i ke gula Opira hoi i na pohaku o na kahawai

25A o ka Mea mana kou gula, A me ke kala o na waiwai nou.

26No ka mea, alaila e hauoli oe i ka Mea mana, A e hoala ae i kou maka i ke Akua.

27E pule aku no oe ia ia, a e hoolohe mai ia ia oe, A e hooko aku oe i na mea au i hoohiki ai.

28A e noonoo oe i kahi mea, a e hoopaaia oia nou; A e alohi mai ka malamalama maluna o kou mau ala.

29A e hoohaahaaia lakou, alaila e olelo oe, He kiekie; A e hoola mai no ia i ka mea i kulou na maka.

30E hoopakele no ia i ka mea lawe hala; A e hoopakeleia oia ma ka maemae o kou mau lima.