ሄኖክ 81

1ወይቤለኒ፡ ኦ፡ ሄኖክ፡ ነጽር፡ መጽሐፈ፡ ዘጸፍጸፈ፡ ሰማይ፡ ወአንብብ፡ ዘጽሑፍ፡ ዲቤሆሙ፡ ወአእምር፡ ኵሎ፡ አሐደ፡ አሐደ።

2ወነጸርኩ፡ ኵሎ፡ ዘበጸፍጸፈ፡ ሰማይ፡ ወአንበብኩ፡ ኵሎ፡ ዘጽሑፍ፡ ወአእመርኩ፡ ኵሎ፡ ወአንበብክዋ፡ ለመጽሐፍ፡ ወኵሎ፡ ዘጽሑፍ፡ ውስቴታ፡ ኵሎ፡ ምግባሮሙ፡ ለሰብእ፡ ወኵሎ፡ ውሉደ፡ ሥጋ፡ ዘዲበ፡ ምድር፡ እስከ፡ ትውልደ፡ ዓለም።

3ወእም፡ ዝ፡ ሶቤሃ፡ ባረክዎ፡ ለእግዚእ፡ ዐቢይ፡ ወንጉሠ፡ ስብሐት፡ ዘለዓለም፡ በከመ፡ ገብረ፡ ኵሎ፡ ግብረ፡ ዓለም፡ ወሰባሕክዎ፡ ለእግዚእ፡ በእንተ፡ ትዕግሥቱ፡ ወባረኩ፡ ወበከይኩ፡ ዲበ፡ ውሉደ፡ አዳም።

4ወይእተ፡ ጊዜ፡ እቤ፡ ብፁዕ፡ ብእሲ፡ ዘይመውት፡ እንዘ፡ ጻድቅ፡ ወኄር፡ ወኵሉ፡ መጽሐፈ፡ ዐመፃ፡ ዘኢተጽሕፈ፡ ዲቤሁ፡ ወኢተረክበ፡ ጌጋይ፡ በላዕሌሁ፡ በዕለተ፡ ኵነኔ።

5ወእሙንቱ፡ ሠለስቱ፡ ቅዱሳን፡ አቅረቡኒ፡ ወአንበሩኒ፡ ውስተ፡ ምድር፡ በቅድመ፡ ኆኅተ፡ ቤትየ፡ ወይቤሉኒ፡ አይድዕ፡ ኵሎ፡ ለማቱሳላ፡ ወልድከ፡ ወአርኢ፡ ለኵሎሙ፡ ውሉድከ፡ ከመ፡ ኢይጸድቅ፡ ኵሉ፡ ዘሥጋ፡ በቅድመ፡ እግዚእ፡ እስመ፡ ውእቱ፡ ፈጠሮሙ።

6አሐደ፡ ዓመተ፡ ነኀድገከ፡ በኀበ፡ ውሉድከ፡ እስከ፡ ካዕበ፡ ትኤዝዝ፡ ከመ፡ ትምሀሮሙ፡ ለውሉድከ፡ ወትጽሐፍ፡ ሎሙ፡ ወታስምዕ፡ ለኵሎሙ፡ ውሉድከ፡ ወበካልእ፡ ዓም፡ ይነሥኡከ፡ እማእከሎሙ።

7ወይጽናዕ፡ ልብከ፡ እስመ፡ ኄራን፡ ለኄራን፡ ያየድዑ፡ ጽድቀ፡ ጻድቅ፡ ምስለ፡ ጻድቅ፡ ይትፌሣሕ፡ ወይትአምኁ፡ በበይናቲሆሙ።

8ወኃጥእ፡ ምስለ፡ ኃጥእ፡ ይመውት፡ ወምዩጥ፡ ምስለ፡ ምዩጥ፡ ይሰጠም።

9ወእለ፡ ይገብሩ፡ ጽድቀ፡ ይመውቱ፡ በእንተ፡ ምግባረ፡ ሰብእ፡ ወይትጋብኡ፡ በእንተ፡ ምግባሮሙ፡ ለረሲዓን።

10ወበእማንቱ፡ መዋዕል፡ ፈጸሙ፡ እንዘ፡ ይትናገሩ፡ ምስሌየ፡ ወቦእኩ፡ በኀበ፡ ሰብእየ፡ እንዘ፡ እባርኮ፡ ለእግዚአ፡ ዓለማት።