ሄኖክ 12

1እምቅድመ፡ ኵሉ፡ ነገር፡ ተከብተ፡ ሄኖክ፡ ወአልቦ፡ ዘየአምር፡ እምውሉደ፡ ሰብእ፡ በኀበ፡ ተከብተ፡ ወኀበ፡ ሀሎ፡ ወምንተ፡ ኮነ።

2ወኵሉ፡ ግብሩ፡ ምስለ፡ ቅዱሳን፡ ወምስለ፡ ትጉሃን፡ በመዋዕለ፡ ዚኣሁ።

3ወአነ፡ ሄኖክ፡ ኮንኩ፡ እባርኮ፡ ለእግዚእ፡ ዐቢይ፡ ወለንጉሠ፡ ዓለም፡ ወናሁ፡ ትጉሃን፡ ይጼውዑኒ፡ ሊተ፡ ለሄኖክ፡ ጸሓፊ፡ ወይቤሉኒ።

4ሄኖክ፡ ጸሓፌ፡ ጽድቅ፡ ሑር፡ አይድዕ፡ ለትጉሃነ፡ ሰማይ፡ እለ፡ ኀደጉ፡ ሰማየ፡ ልዑለ፡ ወምቅዋመ፡ ቅዱሰ፡ ዘለዓለም፡ ወምስለ፡ አንስት፡ ማሰኑ፡ ወገብሩ፡ ዘከመ፡ ይገብሩ፡ ውሉደ፡ ሰብእ፡ ወነሥኡ፡ ሎሙ፡ አንስተ፡ ወማሰኑ፡ ዐቢየ፡ ሙስና፡ በዲበ፡ ምድር።

5ወኢይከውን፡ ሎሙ፡ በዲበ፡ ምድር፡ ሰላም፡ ወኅድገተ፡ ኀጢአት።

6እስመ፡ ይትፌሥሑ፡ በውሉዶሙ፡ ቀትለ፡ ፍቁራኒሆሙ፡ ይሬእዩ፡ ወዲበ፡ ሀጕለ፡ ውሉዶሙ፡ ይግዕሩ፡ ወይስእሉ፡ ለዓለም፡ ወኢይከውን፡ ሎሙ፡ ምሕረት፡ ወኢ፡ ሰላም።