ሄኖክ 101

1ጠይቅዋ፡ ለሰማይ፡ ኵልክሙ፡ ውሉደ፡ ሰማይ፡ ወኵሎ፡ ግብሮ፡ ለልዑል፡ ወፍርሁ፡ እምኔሁ፡ ወኢትግበሩ፡ እኩየ፡ በቅድሜሁ።

2እመ፡ ዐጸወ፡ መስኮተ፡ ሰማይ፡ ወከልአ፡ ዝናመ፡ ወጠለ፡ ከመ፡ ኢይረድ፡ ዲበ፡ ምድር፡ በእንቲኣክሙ፡ ሚ፡ ሀለወክሙ፡ ትግበሩ።

3ወእመ፡ ፈነወ፡ መዓቶ፡ ዲቤክሙ፡ ወዲበ፡ ኵሉ፡ ምግባሪክሙ፡ አኮኑ፡ አንትሙ፡ ዘታስተበቍዕዎ፡ እስመ፡ ትትናገሩ፡ ዲበ፡ ጽድቀ፡ ዚኣሁ፡ ዐቢያተ፡ ወጽኑዓተ፡ ወአልብክሙ፡ ሰላም።

4ኢትሬእይዎሙኑ፡ ለነገሥተ፡ አሕማር፡ እለ፡ ይትሀወኩ፡ እሞገድ፡ ወያንቀለቅሉ፡ እምነፋሳት፡ አሕማሮሙ፡ ወይትመነደቡ።

5ወበእንተ፡ ዝንቱ፡ ይፈርሁ፡ እስመ፡ ኵሉ፡ ንዋዮሙ፡ ሠናይ፡ ይወፅእ፡ ውስተ፡ ባሕር፡ ምስሌሆሙ፡ ወሠናየ፡ ኢይኄልዩ፡ በልቦሙ፡ እስመ፡ ባሕር፡ ትውኅጦሙ፡ ወይትሀጐሉ፡ ውስቴታ።

6አኮኑ፡ ኵሉ፡ ባሕር፡ ወኵሉ፡ ማያቲሃ፡ ወኵሉ፡ ሑሰታ፡ ግብረ፡ ልዑል፡ ውእቱ፡ ወውእቱ፡ ኵሎ፡ ግብረታ፡ ወማያቲሃ፡ ኀተመ፡ ወአሰረ፡ ኵለንታሃ፡ በኆጻ።

7ወበተግሣጹ፡ ትየብስ፡ ወትፈርህ፡ ወኵሉ፡ ዓሣቲሃ፡ ይመውቱ፡ ወኵሉ፡ ዘሀሎ፡ ውስቴታ፡ ወአንትሙሰ፡ ኃጥኣን፡ እለ፡ ውስተ፡ ምድር፡ ኢትፍርህዎ።

8አኮኑ፡ ውእቱ፡ ገብረ፡ ሰማየ፡ ወምድረ፡ ወኵሉ፡ ዘሀሎ፡ ውስቴቶሙ፡ ወመኑ፡ ወሀበ፡ ትምህርተ፡ ወጥበበ፡ ለኵሎሙ፡ እለ፡ ይትሐወሱ፡ ዲበ፡ ምድር፡ ወለእለ፡ ውስተ፡ ባሕር።

9አኮኑ፡ ውእቶሙ፡ ነገሥተ፡ አሕማር፡ ይፈርህዎ፡ ለባሕር፡ ወኃጥኣንሰ፡ ኢይፈርህዎ፡ ለልዑል።