ሄኖክ 45

1ወዝ፡ ካልእ፡ ምሳሌ፡ ዲበ፡ እለ፡ ይክሕዱ፡ ስሞ፡ ለማኅደረ፡ ቅዱሳን፡ ወለእግዚአ፡ መናፍስት።

2ኢ፡ ሰማየ፡ የዐርጉ፡ ወኢ፡ ምድረ፡ ይበጽሑ፡ ከመ፡ ዝ፡ ይከውን፡ ክፍለ፡ ኃጥኣን፡ እለ፡ ይክሕዱ፡ ስሞ፡ ለእግዚአ፡ መናፍስት፡ እለ፡ ከመ፡ ዝ፡ ይትዐቀቡ፡ ለዕለተ፡ ሥራሕ፡ ወምንዳቤ።

3ወበይእቲ፡ ዕለት፡ ይነብር፡ በመንበረ፡ ስብሐት፡ ኅሩይ፡ ወየኀሪ፡ ምግባሪሆሙ፡ ወምዕራፎሙ፡ ወኍልቊ፡ አልቦሙ፡ ወመንፈሶሙ፡ በማእከሎሙ፡ ትጸንዕ፡ ሶበ፡ ርእይዎ፡ ለኅሩየ፡ ዚኣየ፡ ወለእለ፡ ይሰክዩ፡ ስምየ፡ ቅዱሰ፡ ወስቡሐ።

4ወበይእቲ፡ ዕለት፡ ኣነብሮ፡ በማእከሎሙ፡ ወእዌልጣ፡ ለሰማይ፡ ወእገብራ፡ ለበረከት፡ ወብርሃን፡ ዘለዓለም።

5ወእዌልጣ፡ ለየብስ፡ ወእገብራ፡ ለበረከት፡ ወለኅሩያነ፡ ዚኣየ፡ ኣነብሮሙ፡ ውስቴታ፡ ወእለሰ፡ ይገብሩ፡ ኀጢአተ፡ ወጌጋየ፡ ኢይከይዱ፡ ውስቴታ።

6እስመ፡ አነ፡ ርኢክዎሙ፡ ወአጽገብክዎሙ፡ በሰላም፡ ለጻድቃንየ፡ ወአንበርክዎሙ፡ ቅድሜየ፡ ወቀርበት፡ ኀቤየ፡ ኵነኔየ፡ ለኃጥኣን፡ ከመ፡ ኣህጕሎሙ፡ እምገጸ፡ ምድር።