Tituj 3

1KATAMAN kin irail ren peiki on monjap o me manaman akan, o ren apwali wiawia mau karoj.

2Der lalaue amen, der akamai, a en kamantik, o opampap on aramaj akan karoj.

3Pwe kitail pil pweipwei maj o, o jopeik, o jalonala, o papa jon en inon o madon jued akan, kokoa me jued, o peirin, pakailok, o kailonki amen amen.

4A kalanan o limpok en Kot atail Jaundor lao pwarado,

5A kotin dore kitail la kaidin pweki pein atail wiawia pun, a pein a kupur ki paptaij en kaipwi kap o kawilia kap ren Nen jaraui.

6Me a kotin kupura don kitail kaualap ren Iejuj Krijtuj atail Jaundor.

7Pwe kitail en pun kila a mak, pwen jojoki maur joutuk duen at kaporopor.

8Melel padak pot et o i men, koe en nantion kaweweda, pwe irail, me pojonla Kot, en kadoke kin ir wiawia mau, mepukat me mau o kon on aramaj akan.

9A liki jan peidok mal akan, o padok en tiak kan, o akamai, o akamai ki kapun, pwe mepukat jota kadepa o me mal.

10Aramaj likin panau amen, panaui pan mepak de ria pak ap muei jan i.

11Pwe koe aja, me i me japun o kin wia dip, a kadeikada pein i.

12I lao kadar won uk Artemaj de Tikikuj, koe madan don ia, Nikopolij, pwe i kileledier me i pan kaujon waja o ni anjaun kapau.

13Jaunkawewe Jenaj o Apoloj kadara don ia madan. Jauaja ira, pwe ira de anane meakot.

14O naitail akan en porijok o koiokki on wiawia mau, pwe ren der jo wa ’rail.

15Karoj, me mi re i, kin ranamau won uk. Ranamau won karoj, me kin pok on kit ni pojon. Mak o en mi re omail karoj!