Lukaj 20

1KADEKADEO eu ran ni a kotin kawewe on aramaj akan nan im en kaudok o, o padaki ronamau, jamero lapalap, o jaunkawewe, ianaki jaumaj akan ap ko don i.

2Potoan on i indada: Majani on kit, manaman en ij, me komui wiaki mepukat? De ij me ki on komui manaman wet?

3A kotin japen majani on irail: I pil pan kalelapok meakot re omail, komail en japen ia!

4En Ioanej a paptaij men nanlan, de me ren aramaj?

5Irail ap lamelame nan pun arail indada: Ma kitail pan inda, men nanlan, a pan majani on kitail: Da me komail jo pojonki i?

6A ma kitail inda, me ren aramaj, aramaj karoj ap pan kate kit, pwe re kin wia jaukopki Ioanej.

7Irail ari japen, me re jaja, waja me a kojan ia.

8Iejuj ap kotin majani on irail: Ari, I pil jota pan indai on komail, manaman en ij, me I wiaki mepukat.

9A ap kotin tapiada majani on pokon o karajeraj wet: Aramaj amen padukedier mat en wain eu, ap liki on jaumat akai, o kokola nan wai anjau warai.

10A lao anjau, a kadaralan jaumat akan ladu men, pwe ren ki on kijan wan wain. A jaumat akan woki i, o kadarala i kaip.

11A murin met a pil kadarala amen ladu, a re pil woki i, o wia juedi on, o kadarala i kaip.

12A murin met a kadarala kajilimen. A re pil kame i o jiken wei jan.

13Monjap en mat en wain o ap majani: Da me i en wiada? I pan kadarala nai ol kompok, ele re pan majak, ni ar pan kilan i.

14A jaumat akan lao kilaner i, rap lamelame nan pun ar indada: Iei i, me pan ale jojo, kitail pan kamela, pwen id aneki a jojo.

15Irail lao kajapoka jan i nan matuel o, ap kamela i. Da me monjap en mat en wain pan wiai on irail?

16A pan kodo kamela jaumat pukat, ap liki on akai a mat en wain. Irail lao roner mepukat, rap indada: O mepukat jota pan wiaui!

17A kotin jaupei won irail ap kotin majani: Iaduen wewe en intin wet: Takai o, me jauje kajapokela, id wiala takai en pukakaim?

18Meamen, me pupedi pon takai wet pan ola. A me a pupedi on poa, a pan kapitaka pajan i.

19I dokan o jaunkawewe o jamero lapalap akan raparapaki en jaikidi i. A re majak aramaj akan, pwe re muilikiada, me a karajeraj kin irail.

20Irail ari majamajan i o kadarala liparok kai, me pan wia kin pein irail aramaj pun, pwe ren jaikikidi i a majan akan ap panalan jaunkapun o manaman en kopina.

21Irail ari kalelapok re a potoan on: Jaunpadak, kit potoan aja, me ar majan o padak kan me pun, o re jota kotin kupuroki janjal en aramaj. Pwe re kin kotin kaukaweweda melel duen al en Kot.

22Me pun kit en nopwei on nanmarki, de jo?

23A i kotin mani ar widin, ap majani on ir: Da me komail kajonejon kin ia?

24Kajale don ia denar eu! Mom en ij o intin wet? Re japen potoan on: En nanmarki.

25A i kotin majani on irail: Ari komail ki on nanmarki, me nain nanmarki, o on Kot, me japwilim en Kot!

26Irail ari jota kak jaikikidi I a majan akan mon pokon o. Irail puriamuiki me a kotin japen, o nenenlata.

27Jadujar akai, me kin inda, me dene melar akan jolar pan maureda, ap kai don i kalelapok re a,

28Potoan on: Jaunpadak, Mojej intinie don kit, ma ri ol en amen pan mela, me a paud li dapwan men, ri a ol ap pan paudekida i, pwen kaipwi on ri a ol na jeri kai.

29Ari, pwin pirien, ol ijimen mia, men maj paudeki li amen, ap mela, a jota na jeri ko.

30A kariamen paude kida li o ap mela a jota na jeri ko.

31A kajilimen paude kida i, iduen ir ijimen karoj, re mela, ap jota nairail jeri ko.

32A ikmuri li o pil mela.

33Ari, ni en me melar akan ar iajada, a pan en ij a paud? pwe ir ijimen karoj paude kida i.

34Iejuj kotin majani on irail: Jeri en jappa et kin papaud o kapapaud.

35A me war on ale eu jap o konodi maureda jan ren me melar akan, re jota kin papaud de kapapaud.

36Pwe re pil jolar kak mela. Pwe re paroki on tounlan kan, o re jeri en Kot akan, pwe re jeri en kamaur.

37A duen en me melar akan ar pan maureda, Mojej pil kadededa, ni a udial tuka o, ni a kaadaneki Kaun o: Kot en Apraam, o Kot en Ijaak, o Kot en Iakop.

38Pwe Kot kaidin Kot en me melar akan, a en me maur akan, pwe karoj memaur on i.

39A Jaunkawewe kai japen indada: Jaunpadak, ar majan me pun.

40Irail ap jolar kak peidok re a okotme,

41I ari kotin majani on irail: Iaduen ar indinda, me Krijtuj nain Dawid?

42A pein Dawid katitiki nan puk en Pjalm: Kaun o kotin majani on ai Kaun: Mondi on ni pali maun i.

43Lao I pan wia kida om imwintiti utepan na om.

44Dawid ari wia kin i a Kaun, a iaduen a pan kak na ol?

45A ni aramaj karoj ronadar, a kotin majani on japwilim a tounpadak kan:

46Kalaka jaunkawewe kan, me kin mauki momait jili nan likau reirei o mauki, aramaj en ranamau on irail nan waja en netinet akan, o men mondi leppantam nan jinakoke kan o ni tapin tepel.

47Me kin nopur im en li odi kan, liajojki kapakap reirei, mepukat pan panalan kadeik apwal.